पोखरा उद्योग वाणिज्य संघको ३४ औं अधिवेशन यहि भदौ २४ र २५ गते पोखरामा सम्पन्न हुंदै छ । संघको अध्यक्षमा वर्तमान वरिष्ठ उपाध्यक्ष पवन कुमार प्रजापति र वर्तमान वाणिज्य तर्फका उपाध्यक्ष अर्जुन पोखरेल भिड्दै छन् । दुवै जनाले आ–आफ्नो प्यानलबाट पदाधिकारी एवं सदस्यहरुको नाम सार्वजनिक गरिसकेका छन् । अर्जुन पोखरेलको प्यानलबाट उद्योग तर्फको उपाध्यक्ष पदमा सफल युवा ब्यवसायी देवेन्द्र केसी निर्वाचनमा भाग लिंदै छन् । 

वि.सं. २०४४ साल चैत्र २५ गते कास्की जिल्ला अन्नपूर्ण गाउंपालिका ०४ सल्यानमा जन्मिएका केसी सानै उमेर देखि ब्यवसायीक क्षेत्रमा क्रियाशिल छन् । सुरुमा हरीचोकमा सल्यान भदौरे किराना पसल स्थापना गरेर आफ्नो ब्यवसायिक यात्रा प्रारम्भ गरेका उनले छोटो समयमै फड्को मार्दै गए । हाल उनका द कुटी रिसोर्ट,होटल कुटी पोखरा,सुपर मेट्रो ट्राभल्स,द सोनिया अटो मार्ट,बिन्दास मिनरल वाटर,बलेनी क्याफे,कुटी एग्रो फर्म लगाएत आधा दर्जन भन्दा बढी ब्यवसाय संचालनमा छन् । ब्यवसायीक क्षेत्रमा मात्र नभई उनी सामाजिक क्षेत्रमा पनि उत्तिकै सक्रिय मानिन्छन् ।   

सरल,मृदुभाषी एवं शालिन स्वभावका धनि देवेन्द्र केसीसंग अघिल्ला दुई कार्यसमितिमा सदस्यको रुपमा काम गरेको अनुभव छ । ३३ औं अधिवेशनमा केसी सर्वाधिक मतका साथ विजयी भएका थिए । केसीले आफु संघलाई बलियो बनाउंदै संघका सदस्यहरुको हक,हित र अधिकार प्राप्तिको लागि सदैव प्रतिवद्घ रहेको बताएका छन् । संघलाई यसका हरेक सदस्यहरु प्रति उत्तरदायी बनाउन र सदस्यहरुलाई सबल र सक्षम बनाउनका निम्ति आसन्न ३४ औं अधिवेशनमा आफुं लगाएत आफ्नो प्यानलका सबै पदाधिकारी एवं सदस्यहरुलाई अत्याधिक मतका साथ बिजयी गराउनुपर्ने केसीको भनाई छ ।