काठमाडौं । गण्डकी प्रदेशसभाको बैठक शुक्रबार दिउँसो बस्ने भएको छ । 

प्रदेश प्रमुख डिल्लीराज भट्टले नेपालको संविधानको धारा १८३ को उपधारा १ बमोजिम गण्डकी प्रदेश सरकार मन्त्रिपरिषदको सिफरिसमा शुक्रबार दिउँसो ३ बजेदेखि शरु हुने गरी बैठक आह्वान गर्नुभएको हो।

नियुक्तिदेखि नै विवादस्पद रहेको मुख्यमन्त्री खगराज अधिकारीको सरकारले प्रदेश सभाको बैठक बोलाएको विषय पनि विवादित नै बनेको छ ।

गत चैत २५ गते मुख्यमन्त्री नियुक्त हुनुभएका अधिकारीको नियुक्ति विवादमा रहेको हो । बहुमतसहित मुख्यमन्त्रीमा दावी गर्ने क्रममा सभामुखलाई समेत समावेश गरेको भन्दै उहाँको नियुक्ति अहिले विवादमा रहेको छ । 

उहाँको नियुक्तिको विषयमा सर्वोच्च अदालतले यहि वैशाख १० गते पूर्ण सुनुवाई गर्ने भन्दै दीर्घकालमा असर पर्ने कुनै निर्णय नगर्न अन्तरिम आदेश दिएको हो ।

सर्वोच्चको अन्तिम फैसलापछि मात्र उहाँको सरकारको भविष्य तय हुने भएको छ । तर मुख्यमन्त्री अधिकारीले भने सर्वोच्चको सुनुवाई अघि नै विश्वासको मत लिने तयारीमा लागेपछि जसको विरोध समेत शुरु भएको हो । 

विश्वासको मत लिने गरी बैठक बोलाइएको भएपनि अहिलेसम्म मुख्यमन्त्री अधिकारीले शुक्रबारको बैठकमा विश्वासको मत लिने बारे प्रदेश सभालाई जानकारी नदिएको बुझिएको छ ।

अर्को तर्फ नेपाली कांग्रेसले भने प्रदेश सभाको बैठक बोलाइएकोप्रति आपत्ति जनाउदै गैरसंवैधानिक भनेको हो। कांग्रेस र राप्रपाले शुक्रबारको बैठक बहिष्कार गर्ने तयारी गरेको छ ।